Хаяг байршил
Нийтлэг асуулт хариулт
Монгол улсын ерөнхий прокурорын газар
Эхлэл МУ-ын Ерөнхий прокурор
Онцлох мэдээ
АХМАД ПРОКУРОР, МОНГОЛ УЛСЫН ДУГУЙН СПОРТЫН МАСТЕР, МОНГОЛЫН ЗОХИОЛЧДЫН ЭВЛЭЛИЙН ГИШҮҮН, ЯРУУ НАЙРАГЧ МААМЫН ЧУЛУУН

Ахмад прокурор, Монгол Улсын дугуйн спортын мастер, Монголын зохиолчдын эвлэлийн гишүүн,  яруу найрагч  Маамын Чулуунтай хийсэн ярилцлагыг толилуулж байна.

Тэрээр Дорноговь аймгийн Алтанширээ  сумын харьяат.  Прокурорын байгууллагад 36 жил алдаа, эндэгдэлгүй ажиллахын зэрэгцээ  "Алтан шаргал тариа", "Хараацай минь нисээрэй", "Ижий дэлхий" зэрэг нийтийн  хүртээл болсон олон дууны үгийг бичсэн яруу найрагч, дугуйчин залуучуудын баг бүрдүүлж эх орныхоо  23 аймаг, 3 хот, 163 сумаар аялаж  5400 км замыг дугуйгаар туулсан тамирчин хүн.  Дугуйн спортын энэ амжилтаараа "Монгол гайхамшиг-93" наадмын тэргүүн шагнал авч байжээ.

М.Чулуун гуай өөрийн бичсэн  дууны шүлгүүдээр  "Баян буурал", "Миний нутгийн хүмүүс", "Онгод дуудсан араншин",  "Хамгаас дуулах дээжис" зэрэг номуудыг хэвлэн, уншигч түмэндээ барьсан байна. "Алтан шаргал тариа", "Ихэр богд", "Уургын морь", "Хараацай минь нисээрэй" зэрэг дуунууд нь Монголын радиогийн санд оржээ. Одоо М.Чулуун гуай өндөр насны гавьяаны амралтаа эдэлж байгаа боловч төрсөн нутаг Дорноговьдоо уран бүтээлээ туурвиж,  дугуйгаа унаж, уралдаан тэмцээнд оролцсоор явна.

  "Прокурор"  нэрээр овоглон 36 жилийн түүхийг  алдаа эндэгдэлгүй бичилцэж, уран бүтээлээрээ, спортын амжилтаараа олны танил болсон эгэлгүй даруу, эрхэм  хүнтэй хийсэн ярилцлагыг хүлээн авна уу.

-Та сайхан өвөлжиж байна уу. Хүсэлтийг минь хүлээн авч хүрэлцэн ирсэнд баярлалаа.

-Прокурорын байгууллага  намайг гарыг минь ганзганд, хөлийг дөрөөнд хүргэж, хүн болгож төлөвшүүлсэн.  Би "прокурор Чулуун" гэдэг  нэрээрээ үргэлж бахархаж явдаг. Тиймээс ч Ерөнхий прокурорын газраас ярилцлага авая гээд урьж байхад ирэлгүй яахав.

-Та чинь прокурор, яруу найрагч, тамирчин хүн. Хоёуулаа ярилцлагаа  таны уран бүтээлээс эхлэе гэж бодож байна. Таны бичсэн  дууны шүлгүүдээс бүрдсэн "Баян буурал" нэртэй  шинэ ном хэвлэгдэн гарсан байна. Танд баяр хүргэе. Энэ номонд орсон бүтээлүүдийнхээ тухай ?

-За баярлалаа.  Би шүлэг зохиолын 11 номтой. Цэрэг эх орон, аав , ээж,уул ус, говь, хангай, хайр сэтгэл гээд олон сэдвээр бичсэн дууны шүлгүүдээ эмхтгэн "Баян буурал" нэртэй  шинэ ном   хэвлүүллээ. Номыг маань Монгол Улсын төрийн соёрхолт хөгжмийн зохиолч Ц.Чинзориг,  Монгол Улсын төрийн шагналт зохиолч, яруу найрагч П.Пүрэвсүрэн нар хянан, редакторласон.  Энэ номонд орсон дуунууд бүгд  ноттой хэвлэгдсэн. Дууны түүвэр ноттой байж л олон түмэнд хүрнэ.  Би 200-д дууны шүлэг бичсэнээс  144-г нь энэ номондоо түүвэрлэн багтаасан. Номонд орос дуу, уртын дуу орсон. Халх голын дайны дурсамж, Монгол-Оросын дайчдын ялалтанд зориулан  "Ялалтын дурсамж" нэртэй  дууны үг бичиж, сэтгүүлч-орчуулагч Д.Намжилдорж орос хэл дээр орчуулгыг хийж бэлэн болгосон. Энэ дууны  эх нь  Оросын  шинжлэх ухааны төвд хадгалагдаж  байдаг юм. Би 1973 онд Хууль цаазын дунд сургуульд элсэж ороод, намар нь Сэлэнгэ аймгийн Хүдэрийн сангийн аж ахуйд тариа хураалтанд явсан юм.

Говь нутгаас гарч үзээгүй надад захгүй цэлийсэн номин ногоон тал, халиурсан алтан шаргал тариа сэтгэл хөдөлгөж  "Алтан шаргал тариа" дууны шүлгээ бичсэн. Намар нь хотод ирээд зориг гаргаж, Монголын зохиолчдын эвлэлийн  хорооны  зохиолчдын секцийн дарга, Төрийн шагналт яруу найрагч Б.Явуухулангийн  өрөөний хаалгыг тогшин орж билээ. Мэнд мэдэн, шүлгээ өгсөнд  алдарт  Б.Явуухулан тамхиа нэг сорсноо, нүдний шилээ засч  шүлгэн дээр анхаарлаа хандуулан, удаан уншсан. Хэдий удсаныг мэдэхгүй, нэг мэдхэд энгэрээсээ 3 өнгийн бал гарган, улаан балаар нь  шүлгэн дээр минь сарааччих шиг л болсноо, надад өгсөн. Би тэр үед юу гэж бичсэнийг нь унших сөгөөгүй аваад гарсан юм.  Барилгачдын соёлын ордны цайны газарт орж,  нөгөө шүлгээ гаргаад хартал " Ая хийхийг зөвшөөрөв" Б.Явуухулан гэж бичээд 1973.10.23  яруу найргийн секц 382" гэсэн тэмдэг дарсан байж  билээ.

Ингээд л   хөгжмийн зохиолч Балдан гуайд өгч, ая хийлгэж Монгол улсын гавьяат жүжигчин Д.Оросоо симфони найрал хөгжимтэй дуулснаар "Алтан шаргал тариа" дуу маань олны хүртээл болж,  Монголын  радиогийн Алтан санд орсон. Түүнээс хойш Монгол Улсын урлагийн гавьяат  зүтгэлтэн Т.Чимэддорж, П.Хаянхярваа, Д.Баттөмөр зэрэг олон  хөгжмийн зохиолч нартай  хамтран олон  сайхан дуунууд  хийсэн.

-Та  хэдийнээс шүлэг бичиж эхлэв?

-Би 1967-1970 онд Хужирбуланд цэргийн алба хаасан. Бичиг үсгийн чадвар сайтай цэрэг байлаа. Жанжин штабын бичиг хэргийн эрхлэгч байсан. Тэр үед ганц нэг шүлэг бичих гэж оролддог байсан боловч, халагдаж ирээд л бичиж эхэлсэн гэхэд болно доо. 1974 онд Монголын пионерийн байгууллагын түүхт 50 жилийн ойд зориулан зарласан хүүхдийн хөгжмийн зохиолын уралдаанд "Тойг, тойг"  дууны шүлэг бичиж оролцож, 3 дугаар байранд шалгарч, Хүүхдийн төлөө фондын Төв комиссын дарга А.И  Цэдэнбал- Филатова,  Монголын хөгжмийн зохиолчдын холбооны дарга С.Гончигсумлаа  нараас шагнал гардаж авсан маань дууны шүлэг бичих урам зориг өгсөн юм. Тэр үед  240 төгрөг, Хүндэт диплом хүртсэн нь миний уран бүтээлийн анхны шагнал байлаа.  Би чинь Дорноговийн Алтанширээ сумын харьяат. Соёлын гавьяат зүтгэлтэн Г.Жамьяан, Ш.Гүрбазар, Ардын уран зохиолч, Төрийн соёрхолт, Соёлын гавьяат зүтгэлтэн Б.Догмид, Гавьяат жүжигчин Ж.Ёндонжамц гээд олон авьяастнууд манай сумаас төрсөн. Урлаг соёлын олон хүмүүс төрсөн нь учиртай гэж боддог. Нутгынхаа Их ноён хутагтын   бүтээлийг нь уншиж, түүгээр хөглөгдөж, уул усанд нь сүсэглэж явсан хүмүүс үгийн тансаг, аялгууны сайхныг эзэмшихээс ч аргагүй гэж боддог. Шүлэг бичих гэдэг зүгээр нэг өргөдөл бичихтэй адилгүй ээ. Сэтгэлийн хөдлөл, баяр баясгалан, уйтгар гунигтай  ямарч үед шүлгийн үг орж ирж болно. Тэр үед л дор нь бичиж авахгүй бол дахин давтагдахгүй.

-Таны уран бүтээл дотор шүүгч, прокурор, өмгөөлөгч гээд хуулийнханд зориулж бичсэн шүлгүүд байна. Ер нь хуулийн бидэнд зориулсан шүлэг найраглал ховор байдаг .

-Тийм шүү. Хуульчийн жаргал зовлонг мэдэх л хүн бичнэ үү гэхээс  зүгээр нэг яруу найрагч  прокурор, шүүгч, мөрдөн байцаагчын тухай бичээд байхгүй. Мөрдөн байцаагчийн  ажлыг прокурор л хамгийн сайн мэднэ. Нэг өдөр 3 хүн амины хэргийн газрын үзлэгт ороод,  дараа нь задланд нь ороод  ирсэн  хүний сэтгэл санаа ямар байх вэ.  Тэнд байсан прокурор, мөрдөн байцаагч 2 л  мэднэ шүү дээ. Энэ ч утгаараа хамт ажиллаж байсан шүүгч, мөрдөн байцаагч, өмгөөлөгч нартаа зориулж бичсэн шүлгүүд нэлээдгүй байгаа. Прокурорын ажлыг хийж байхад уран бүтээлийн сэдэл санаа орж ирдэг байсаныг л буулгасан хэрэг.  "Төрийн мэргэн зөвлөхүүд", "Монгол төрийн цагдаа", "Мөрдөн байцаагчийн алдар" зэрэг дуунууд маань олны хүртээл болсон. "Монгол төрийн цагдаа" дууны шүлэг Цагдаагийн ерөнхий газраас зарласан уралдаанд байр эзэлж байсан. Мөрдөн байцаах байгууллага байгуулагдсаны 50 жилийн ойн уран бүтээлийн уралдаанд миний "Мөрдөн байцаагчийн алдар" дуу тэргүүн байр, "Зүүдний мөрдөн байцаагч бүсгүй" дуу маань дэд байр, "Мөрдөн байцаагч та" дуу 3 байранд орж бүх шагналыг нь би авч байлаа.

-За прокурор сэдэв рүүгээ ороё. Яаж яваад прокурор болчихов?

-Прокурор болно  гэсэн бодол  байгаагүй. 1970 онд цэргээс халагдаад нутагтаа ирсэн. Халагдахад цэрэг болгонд тодорхойлолт өгдөг байсан. Тэр жил  Дорноговь аймагт  200-д цэрэг халагдаад очиж байлаа. Миний тодорхойлолтонд "бичиг үсгийн чадвар сайн,  зохион байгуулах чадвартай" гэж бичсэн байсан. Аймгийн намын хороо тодорхойлолт үзээд  "Алтан ширээ сумын даргын орлогчоор  яв"  гэсэн юм. Би олон малын тоо, тооллого хийнэ, чадахгүй байх гээд  зөвшөөрөөгүй. Нэг өдөр аймгийн хөдөлмөрийн товчооноос дуудаж байна гэлээ. Яваад очсон чинь "аймгийн прокурор дээр очиж уулз" гэсэн. Аймгийн прокурор тэр үед  гавьяат хуульч Х.Жамбал гуай байсан юм.  Х.Жамбал гуай  "чиний хувийн хэрэг, ар гэр, ахуй амьдралыг судаллаа, Дорноговийн харьяат хүн юм байна,  чамайг прокурор болгоно" гэлээ.  Би  "хуулийн мэдлэг байхгүй, барахгүй  байхаа" гэсэн чинь  Чи мэддэг юм биш,  манай чухал хэргийн мөрдөн байцаагч Халзан, орлогч Доржийн Лхамсүрэн гээд  боловсролгүй л орж ирсэн. Сургууль курсээр явж байгаад  боловсрол эзэмшээд байна гэлээ. Тэгээд л анкет, өргөдөл бичүүлж аваад, дуудхаар ирээрэй гэсэн. Сар гарангийн дараа дуудхаар нь яваад очтол "хэсгийн прокуророор томиллоо" гэсэн Авхиа прокурорын гарын үсэгтэй  тушаал өгсөн. Ингээд л прокурор болсон доо. Нэг өрөөнд суугаад хуулиудыг уншиж, прокуроруудын бичсэн одоогоор эрх зүйн баримттай танилцаж, судалж, туршлагатай прокуроруудаар заалгаж эхэлсэн дээ. 3 жил 5 сум хариуцсан хэсгийн прокуророор ажиллаж байгаад 1973 онд хуулийн дунд сургуульд орсон. Төгсөөд  Улаанбаатарын  прокурорын  газарт ерөнхий хяналтын прокуророор томилогдсон. Намайг Гомбодорж прокурор авна гэж зүтгэсээр байгаад авч билээ. Ингээд 1 жил ажиллаж байгаад Дорнод аймагт шүүхийн хяналтаар томиллогдож очсон. Тэндээ 10-д жил ажиллаад,  Дорноговь аймагт томилогдож  25 жил ажиллаад,  гавьяаны амралтандаа гарсан. Ажиллах хугацаандаа Цэргийн дээд сургууль төгссөн.

-Таныг гэмт хэргээс урьдчилан сэргийлэх ажлыг  улсын хэмжээнд зохион байгуулж байсан гэж ярьдаг. Энэ талаараа дурсаач?

Гэмт хэргээс урьдчилан сэргийлэх ажил хуулийн байгууллагын "номер нэг" ажил байсан. "Гэмт хэрэг үйлдсэний төлөө ял шийтгэж байхгүйн тулд урьдчилан сэргийл" гэсэн үг байсан. Прокурорын байгууллагын дэргэд Гэмт хэргийн шалтгаан нөхцлийг судлах хүрээлэн гэж байлаа. Энэ чиглэлийн ажлын туршлагатай мундаг прокурорууд байлаа шүү дээ. Сосорбарам прокурорыг нэрлэж болно. Прокурорууд тэр үед  лекц яриа хийх,  гэмт хэрэгт холбогдож болзошгүй хүмүүсийг  дааж авах, онол практикийн хурал хийх зэрэг олон арга хэлбэрээр ажилладаг байлаа. 1979 онд Аймгийн прокурорын газрын дэргэд 10-д гишүүнтэй "Хууль, спорт сурталчлах залуучуудын улсын анхны гавшгай бригад"-ыг байгуулж, дугуйгаар сум, баг, хороодод явж, үдэшлэг уулзалт,  яриа таниулга, хяналт шалгалт хийдэг байлаа. Нэг суманд очоод зарлал тавиад яриа таниулгаа хийнэ, дараа нь үдэшлэг зохион байгуулдаг. Дугуйн дээрээ тараах материал, узел, цагаан хоолойгоо ачаад явдаг байж билээ. Манай энэ ажлыг аймгийн болон Монголын Хувьсгалт Залуучуудын эвлэлийн хороо дэмжээд Улсын хэмжээний Хувьсгалт Залуучуудын анхан шатны хороодыг уриалж, 2 жилийн хугацаатай үүрэг авч  ажилласан. Энэ нь прокурорын байгууллагын  гэмт хэргээс урьдчилан сэргийлэх иргэд, олон нийттэй амьд холбоо тогтоосон үр дүнтэй ажил гэж дүгнэгдэж, Монголын Хувьсгалт Залуучуудын эвлэлийн хорооноос "Дорнод аймгийн прокурорын газрын хууль сурталчлах бригадын ажлыг улс орон даяар анхан шатны эвлэлийн хороод хэрэгжүүлсүгэй" гэсэн тогтоол гарч байлаа.

 

 

 

 

 

 

 

 

 

-Та "дугуйн спортын мастер" хүн. Ажил хобигоо хослуулж явсаны үр дүнд ийм амжилтанд хүржээ гэж ойлголоо.

-Тийм шүү.  Намайг  4 дүгээр ангид байхад  манайх аймгийн төвд ирсэн юм. Тэгхэд  хүргэн ах Цэвээндорж дугуйтай тосож авсан. Тэр үеээс л дугуй унах хорхой хөдөлж, хүргэнийхээ дугуйг унахын хүсдэг байлаа. Би  55 жил дугуй унаж, 43 жил  уралдаан тэмцээнд оролцож, 36 жил дугуйн спортын дасгалжуулагч  хийж байна.  Эх орныхоо 23 аймаг, 3 хот, 163 сумаар 54000 км замыг дугуйгаар туулж, 60 гаруй мянган хүнд хууль, спортын сурталчилгаа хийсэн  байдаг. Энэ амжилтаараа  "Монгол гайхамшиг-93" наадмын тэргүүн байрын шагнал авсан. 1939 оны Халх голын байлдаанд оролцож, баатарлагаар  амь алдсан 22 настай Монгол Улсын баатар Маземын Экейн гэх хүний  булшний шороог Халх голоос дээжилж,  их бууны хонгионд хийж  аваад 6198 км замыг дугуйгаар  туулаад  63 хоног явж, 1983 он  5 сарын 9 өдөр буюу Ялалтын баяраар Баян-Өлгий аймагт  очиж хүлээлгэж өгч байлаа. Энэ 63 хоногоос  45 хоног нь дугуйн дээр явсан байдаг. Манай аялалын багт  10 хүн байснаас Чойжилсүрэнгийн Батнасан гэж 1 эмэгтэй  байлаа.

-Тэр үед ямар маркийн дугуй унадаг  байсан бэ ?

-Тэр үед чинь ганц араатай Украйн дугуйгаар  л аялдаг байсан.  Биеээс их хүч гарна. Одоо  янз бүрийн сайхан дугуйнууд байнаа. 1970 оноос дасгалжуулагч  хийсэн.  1000 -д шавь байгаагаас хамт аялсан олон хүн байдаг. Улсын аваргын  медалтан, улсын зэрэг цолтой 10-д тамирчид байна. Би одоо ч дугуйгаа унаж байгаа. 10-д дугуй элээсэн. Хамгийн сайн нь  Украйн дугуй л гэж хэлнэ дээ. Шаарикийг нь  төмөр дөшин дээр тавиад  лантуугаар цохиход яах ч үгүй үсрээд л явчихна.

-Дугуйгаар аялж байхад тохиолдож байсан  адал явдалтай зүйлээсээ хуваалцаач?

-2 удаагийн тохиолдол  санаанаас гардаггүй юм. 1978 онд  МХЗЭ-ийн 17 дугаар их хурал болоод  бүх аймгуудаас  аймгийн туг шилжүүлэх аялал болж байсан юм. Хавар байсан. Тугаа аваад манай баг Хатанбулаг сум руу явж байсан юм. Тэгтэл гэнэтхэн гэгээн цагаан өдөр харанхуйлаад, үүл гараад, алхмын өмнөх газар харагдахгүй болтол нүүр нүдгүй элсээр шуураад эхэлсэн. Бид ч дугуйгаа тавиад салхи нэвтэрдэггүй куртикээ өмсөөд толгойгоо битүүлээд хэвтээд өгсөн. Хэр удаан хэвтсэнээ ч санадаггүй юм. Шуурга гайгүй болоод юм харагдахтай болсны дараа дугуйгаа харсан чинь урд дугуй салхинд сэнс шиг эргэлдсээр байгаад  хууриадчихсан  юм шиг болчихсан байсан. Тэгээд бид нэг малчин айлд очсон чинь говийн угалз салхи болсон,  яаж эсэн мэнд гарав гэж билээ.  Бас нэг удаа Архангай аймгийн Тэрхийн цагаан нуур орох гээд  10 жилийн нэг хүүхэдтэй  явж байсан чинь  жигтэйхан том хар үүл гараад, ширүүн бороо орсон. Бид хоёр ч явах  аргагүй зогссон. Бороонд  нороод хөлдөхөө дөхсөн. Айлын бага хүүхэд дагуулж явааг хэлэх үү,  яах билээ л гэж бодож байлаа. Би үүргэвчиндээ дандаа Говийн Их Ноён хутагтын зургыг шүтээн болгож авч явдаг юм. Тэгээд арга тасрахдаа Ноён хутагтынхаа зурганд залбираад л урагш зүтгэсээр 1 км гаран яваад, нэг айлд орсон чинь дуугарч ч  чадахгүй байж билээ. Нөгөө айлын хөгшин  шар тос халааж уулгаад, сэргэсэн юм даг.  Аялалд явахдаа ихэнх тохиолдолд би ахалж явдаг. Багийн ахлагчын хувьд хамт яваа хүмүүсийн аюулгүй байдал, цаг агаар гээд олон зүйлийг тооцох ёстой. Дээрх тохиолдлоос хойш айлын хүүхэд авч явхаа больсон.

-Манай прокуроруудаас таны шавь байна уу. Дугуйн спортоор хичээллэх сонирхолтой хүмүүс олон бий дээ.

-Одоогоор прокуроруудаас байхгүй л байна. Миний үед чинь прокурорууд зөвхөн ажлаа хийгээд л явдаг байлаа. Харин сүүлийн үед урлаг, спортын наадам хийдэг болсонд их олзуурхаж байгаа. Ганбаяр прокурорын үед би спортын их наадам хийе гээд санал гаргаад, төсөв хөрөнгө бичиж өгч байлаа. Нэг их ажил болоогүй юм даг.  Спортын их наадмаа угтаад дугуйн аялал зохиож байвал зүгээр гэж боддог.  Дорнод аймагт байхад манай прокурорынхан бүгд спортоор хичээллээд шүүх хяналтын туслах Энхцэцэг байт сураар, нарийн бичиг, бид 2 дугуйгаар аймгийн спартикиадад оролцож, бүх  ард түмний спартикиадад шалгарч  байлаа. Аймгийн прокурор  Дэндэвийн Даваасүрэн гэж хүнээ ч дэмждэг, ажлаа ч хийлгэж чаддаг хүн байсан юм. Бид  өдөр нь ажлаа хийгээд, орой нь бэлтгэлээ базаагаад  спартикиадад оролцож байсан. Тэр үед прокурорын байгууллагад спортоор хичээллээд гайгүй амжилт гаргаж байсан нь Сэлэнгийн  Улсын начин Мижиддорж бид 2  л байлаа. Би аялалд зөвхөн ээлжийн амралтаараа л явдаг байсан юм. Тэгсэн чинь Улсын прокурорын газарт буруу ташаа ойлголт хүрсэн юм шиг байгаа юм. Хотод нэг цугларалт болсон чинь Хэрэг бүртгэлтийн орлогч  Хорхой  гэж прокурор бид 2-г босгоод ажлаа хийхгүй байна гэх ухааны юм ярьлаа. Мижиддоржийг юу ярьсныг санадаггүй юм. Би босоод  "дугуй унаад хэсээд байдаггүй ээ, хуулиа сурталчлаад ажлаа хослуулдаг,  би дугуйгаа хаяхгүй гэж хэлээд сууж билээ. Арга хэмжээ авах юм болоод л байсан. Тэгсхийгээд  чимээгүй болсон. Тэр үед манай аймгийн прокуророос авхуулаад  Дэндэвийн Даваасүрэн, жижиг Дамдинсүрэн,  Жамбаа, хотын Даваадорж, Сүрэнхорлоо, Өлзий, Ядмаа  гээд хүнтэй ажиллах арга барил сайтай мундаг  прокурорууд байлаа шүү дээ.  

 

 

 

 

 

 

 

 

 

Та прокурорууддаа хандаж юу хэлэх бэ?

-Прокурор их нэр хүндтэй ажил. Прокурор хүний бүх ажил, амьдрал нь алганы толио мэт олний  нүдэн дээр ил байдаг.  Үгээ цэнэж,  үйлдлээ хянаж явахгүй бол  нэг үхрийн эвэр доргихоор мянган үхрийн эвэр  доргино гэдэг шиг байгууллагын нэрэнд цөв сууна. Прокурорын байгууллагын босгыг өндөр байлгах хэрэгтэй. Шалгарсан хуульч нар л прокурор болох ёстой гэж боддог. Их залуужсан байна. Хөрвөх чадвар муу байна гэж бодох юм. Бидний үед чинь прокурор бүх л хяналтын чиглэлээр ажилладаг байлаа. Харьцаа хандлаган дээрээ анхаарах хэрэгтэй. Сайн ч хүн, муу ч хүн бай  уулзаад мэнд мэдээд, үгийг нь бүрэн анхааралтай сонсоод шийдвэрээ тайлбарлаж, зүг чигийг нь зааж өгхөд,  ямар ч хүн хүлээж авна шүү дээ. Байн байн цагаа хараад, босч өндөлзөөд, ойлгох ойлгохгүй  хууль яриад байвал хүн сэтгэлээ нээж үгээ хэлэхгүй, уурлаж бухимдаад л гарна. Энэ  бүхэнд залуучууд маань анхаараасай л гэж бодож явдаг. Прокурорын байгууллагатай ажил амьдралаа холбосондоо би байнга баярлаж, хувь заяандаа талархаж явдаг.  Байгуулагынхаа бүх прокурорууд, ажилтан нартай удахгүй болох сар шинийн баярын мэнд хүргэе.

 Танд баярлалаа. Урт насалж удаан жаргаарай .

Ярилцсан:Ц.Өлзийжаргал

Сэтгэгдэл (7)
Дорнод аймгийн ерөнхий прокурор Т.Ууганбаатар
Манай аймагт олон жил ажиллаж прокурорын байгууллагын нэр хүндийг өндөрт өргөж, орчин цагийн прокурорын байгууллагын суурийг бэлтгэж өгсөн ахмад прокурор М.Чулуун гуайдаа сар шинийн мэнд дэвшүүлж, эрүүл энх сайн сайхан бүхнийг хамт олныхоо өмнөөс өргөн дэвшүүлэе. Дорнод аймгийн пркурорын газрын хамт олон.
Т.Энхтайван
Сайхан сэтгэлтэй,сайн хүн.Их ч шударга,хуульчдад үлгэр болсон мундаг хүн дээ.
Хийсэн бүтээсэн зүйл ихтэй. Мундаг хүн шүү. Залууст үлгэрлэл болсон. Олон ч шавь төрүүлсэн. Эрүүл энх аз жаргалыг хүсэн ерөөе. Сайхан шинэлээрэй.
Хайртай нагац ахынхаа ярилцлагыг уншаад сэтгэл огшиж байна таниараа бахархаж байна та минь аливаад хоёргүй сэтгэлээр ханддагт ажил үйлс амьдрал нь сайн сайхан байдаг гэж дүү нь боддог юмаа та минь урт насалж удаан жаргаарай таньдаа маш их хайртай шүү
Айжуу прокурор
сайхан яриулага болжнэ.Жинхэнэ хөдөлмөоч их ажил амжуулсаг мөнхийн завгзй явдаг тал бүрийг авьяастай жинхэнэ шудаога хүндээ Монгол улсын гавьяат хуульч бопох ерөөл дэвшүүье Урт наслаарай сар шинэдээ сайран шинэлээрэй
танд аз жаргал эрүүл энхийг хүсэн ерѳѳе
Домог болсон хүн дээ." Шударга Чулуун" хочтой төрийн хүний үлгэр жишээ болсон буурал прокурор нас 70 гарсан гэхэд тавьтай юм шиг харагддаг. Урт насалж удаан жаргаарай
Санал асуулга
Веб статистик
2017.12.01-ний өдрөөс хойш
Өнөөдөр
102
Өчигдөр
724
7 хоногт
2302
Сүүлийн сард
9297
Сүүлийн жилд
96441
Нийт хандалт
147653